അന്താരാഷ്ട്ര തലത്തിൽ പുറത്തുവിട്ട 2026-ലെ ആഗോള പാസ്‌പോർട്ട് സൂചികയിൽ ലോകത്തിലെ ഏറ്റവും ശക്തികുറഞ്ഞ പാസ്‌പോർട്ടായി അഫ്ഗാനിസ്ഥാൻ വീണ്ടും തെരഞ്ഞെടുക്കപ്പെട്ടു. ‘ഗ്ലോബൽ സിറ്റിസൺ സൊല്യൂഷൻസ്’ 197 രാജ്യങ്ങളെ ഉൾപ്പെടുത്തി തയ്യാറാക്കിയ പട്ടികയിലാണ് അഫ്ഗാനിസ്ഥാൻ ഏറ്റവും അവസാന സ്ഥാനത്ത് എത്തിയത്.

യാത്രാ സ്വാതന്ത്ര്യം (50%), നിക്ഷേപ അവസരങ്ങൾ (25%), ജീവിതനിലവാരം (25%) എന്നീ മൂന്ന് പ്രധാന ഘടകങ്ങളെ അടിസ്ഥാനമാക്കിയാണ് ഈ സൂചിക തയ്യാറാക്കുന്നത്. ഇതിൽ 100-ൽ വെറും 23.10 പോയിന്റുകൾ മാത്രമാണ് അഫ്ഗാനിസ്ഥാന് നേടാനായത്. ദീർഘനാളായുള്ള ആഭ്യന്തര യുദ്ധവും രാഷ്ട്രീയ അസ്ഥിരതയും സാമ്പത്തിക പ്രതിസന്ധിയും നേരിടുന്ന സൊമാലിയ, തെക്കൻ സുഡാൻ, യെമൻ, സിറിയ എന്നീ രാജ്യങ്ങളാണ് അഫ്ഗാനിസ്ഥാന് തൊട്ടുമുകളിലുള്ളത്.

വിസയില്ലാതെ യാത്ര ചെയ്യാവുന്ന രാജ്യങ്ങളുടെ എണ്ണം കണക്കാക്കി പുറത്തുവിട്ട പ്രശസ്തമായ ‘ഹെൻലി പാസ്‌പോർട്ട് സൂചിക 2026’ (Henley Passport Index)-ലും അഫ്ഗാനിസ്ഥാൻ തന്നെയാണ് ഏറ്റവും പിന്നിൽ. അഫ്ഗാൻ പാസ്‌പോർട്ട് ഉള്ളവർക്ക് മുൻകൂട്ടി വിസ എടുക്കാതെ ലോകത്തെ വെറും 24 ഇടങ്ങളിലേക്ക് മാത്രമേ യാത്ര ചെയ്യാൻ സാധിക്കൂ. ഈ പട്ടികയിൽ 192 രാജ്യങ്ങളിലേക്ക് വിസ രഹിത പ്രവേശനം അനുവദിക്കുന്ന സിംഗപ്പൂരാണ് ഒന്നാം സ്ഥാനത്ത്. ജപ്പാൻ, ദക്ഷിണ കൊറിയ എന്നീ രാജ്യങ്ങളാണ് സിംഗപ്പൂരിന് തൊട്ടുപിന്നിലുള്ളത്.

2021 ഓഗസ്റ്റിൽ താലിബാൻ അഫ്ഗാനിസ്ഥാന്റെ ഭരണം പിടിച്ചെടുത്തതിനു ശേഷം ഭൂരിഭാഗം ലോകരാജ്യങ്ങളും താലിബാൻ ഭരണകൂടത്തിന് ഔദ്യോഗിക അംഗീകാരം നൽകിയിട്ടില്ല. നിലവിൽ റഷ്യ മാത്രമാണ് താലിബാനെ ഔദ്യോഗികമായി അംഗീകരിച്ചിട്ടുള്ളത്. താലിബാൻ ഭരണത്തിലാണെങ്കിലും അഫ്ഗാനിസ്ഥാൻ ഇപ്പോഴും പഴയ ‘ഇസ്ലാമിക് റിപ്പബ്ലിക് ഓഫ് അഫ്ഗാനിസ്ഥാൻ’ എന്ന പേരിലാണ് പാസ്‌പോർട്ടുകൾ പുറത്തിറക്കുന്നത്.