പ്രഭാത പ്രാർത്ഥന.........
പൂര്‍ണഹൃദയത്തോടെ ഞാന്‍ അങ്ങയെ തേടുന്നു;അങ്ങയുടെ കല്‍പന വിട്ടുനടക്കാന്‍ എനിക്ക്‌ ഇടയാകാതിരിക്കട്ടെ!
സങ്കീര്‍ത്തനങ്ങള്‍ 119 : 10

സ്നേഹസ്വരൂപനായ ഞങ്ങളുടെ നല്ല ഈശോയേ... അങ്ങയുടെ അനന്തമായ കരുണയാൽ പുതിയൊരു പ്രഭാതത്തിലേക്ക് ഞങ്ങളെ ഉണർത്തിയതിനായി നന്ദി പറയുന്നു. ഇന്നത്തെ ഈ ദിനം അങ്ങയുടെ സ്നേഹത്തിന്റെയും അനുഗ്രഹത്തിന്റെയും തണലിൽ ആരംഭിക്കുവാൻ ഞങ്ങളെ അനുഗ്രഹിക്കണമേ. കർത്താവേ, ഇന്നത്തെ ഞങ്ങളുടെ ഓരോ ചുവടുവയ്പിലും അങ്ങ് കൂടെയുണ്ടാകണമേ. ഞങ്ങളുടെ ചിന്തകളെ വിശുദ്ധീകരിക്കുകയും വാക്കുകളെ മധുരമുള്ളതാക്കുകയും പ്രവൃത്തികളെ നന്മയാൽ നിറയ്ക്കുകയും ചെയ്യണമേ. ജീവിതത്തിലെ പ്രതിസന്ധികൾക്കു മുന്നിൽ തളരാതിരിക്കുവാനുള്ള ശക്തിയും, വേദനകൾക്കിടയിലും പ്രത്യാശ കൈവിടാതിരിക്കുവാനുള്ള വിശ്വാസവും ഞങ്ങൾക്കു നൽകണമേ. ഈശോയേ, ഇന്ന് ഞങ്ങൾ കണ്ടുമുട്ടുന്ന ഓരോ വ്യക്തിക്കും അങ്ങയുടെ സ്നേഹം പകർന്നുനൽകുവാൻ ഞങ്ങളെ സഹായിക്കണമേ. രോഗികൾക്ക് സൗഖ്യവും ദുഃഖിതർക്ക് ആശ്വാസവും നിരാശരായവർക്ക് പ്രത്യാശയും നൽകണമേ. ഞങ്ങളുടെ കുടുംബത്തെയും പ്രിയപ്പെട്ടവരെയും അങ്ങയുടെ തിരുഹൃദയത്തിൽ സമർപ്പിക്കുന്നു. ഞങ്ങളുടെ ഭവനങ്ങളിൽ സമാധാനവും ഹൃദയങ്ങളിൽ സന്തോഷവും ജീവിതത്തിൽ ഐശ്വര്യവും നിറയ്ക്കണമേ. പരിശുദ്ധ കന്യകാമറിയമേ, ഈ പുതിയ ദിനത്തിൽ ഞങ്ങളെ അങ്ങയുടെ മാതൃസംരക്ഷണത്താൽ പൊതിഞ്ഞു കാത്തുകൊള്ളണമേ. ഈശോയേ, ഇന്നത്തെ ഞങ്ങളുടെ എല്ലാ ആഗ്രഹങ്ങളും ആശങ്കകളും അധ്വാനങ്ങളും അങ്ങയുടെ കരങ്ങളിൽ സമർപ്പിക്കുന്നു. അങ്ങയുടെ തിരുഹിതം ഞങ്ങളുടെ ജീവിതത്തിൽ നിറവേറട്ടെ... നിത്യസഹായ മാതാവേ... ഞങ്ങൾക്കുവേണ്ടി പ്രാർത്ഥിക്കേണമേ... ആമേൻ