ഉറങ്ങും മുൻപ്.........വരുവിന്‍, നമുക്കു കുമ്പിട്ട്‌ ആരാധിക്കാം;നമ്മെ സൃഷ്‌ടിച്ച കര്‍ത്താവിന്റെ മുന്‍പില്‍ മുട്ടുകുത്താം. സങ്കീര്‍ത്തനങ്ങള്‍ 95 : 6
എത്രയും കരുണയുള്ള മാതാവേ... ഒക്ടോബർ മാസം മുഴുവൻ അങ്ങയുടെ തിരുക്കുമാരന്റെ രക്ഷാകര രഹസ്യങ്ങൾ ജപമാലയിലൂടെ ധ്യാനിക്കുവാൻ ഞങ്ങൾക്ക് നൽകിയ വലിയ അനുഗ്രഹത്തിന് ഞങ്ങൾ നന്ദി പറയുന്നു. ഈ ജപമാല മാസത്തിന്റെ അവസാന ദിനത്തിൽ, ഞങ്ങളുടെ സന്ധ്യാ പ്രാർത്ഥനയ്ക്കായി അങ്ങയുടെ സന്നിധിയിൽ ഞങ്ങൾ ഒന്നിച്ചു കൂടിയിരിക്കുന്നു. അമ്മേ, ഞങ്ങളുടെ പ്രാർത്ഥനകൾ സ്വീകരിച്ച് അങ്ങേ ദിവ്യകുമാരനായ ഈശോയുടെ പക്കൽ സമർപ്പിക്കണമേ.
പരിശുദ്ധ ജപമാലയുടെ രാജ്ഞിമാതാവേ, ഈ മാസത്തിൽ ഞങ്ങൾ ചൊല്ലിയ എല്ലാ ജപമാലകളും അങ്ങയുടെ തൃപ്പാദങ്ങളിൽ ഒരു പുഷ്പഹാരമായി ഞങ്ങൾ അർപ്പിക്കുന്നു. ഞങ്ങളുടെ അധരങ്ങളിൽ നിന്ന് വീണുപോയ വീഴ്ചകളും പ്രാർത്ഥനയിലെ അശ്രദ്ധകളും ക്ഷമിച്ച്, അമ്മ ഞങ്ങളെ അനുഗ്രഹിക്കണമേ.
ഈ മാസം അവസാനിച്ചാലും ഞങ്ങളുടെ ഹൃദയങ്ങളിൽ ജപമാലയോടുള്ള ഭക്തി മങ്ങിപ്പോകാതിരിക്കാൻ കൃപ ചെയ്യണമേ. ഞങ്ങളുടെ കുടുംബങ്ങളിൽ സമാധാനവും സ്നേഹവും ഐക്യവും നിലനിർത്തണമേ. രോഗികളായ ഞങ്ങളുടെ പ്രിയപ്പെട്ടവരെയും, പരീക്ഷകൾക്ക് ഒരുങ്ങുന്ന മക്കളെയും, ജീവിതത്തിൽ ബുദ്ധിമുട്ടുകൾ അനുഭവിക്കുന്ന എല്ലാവരെയും അങ്ങയുടെ വിമലഹൃദയത്തിൽ കാത്തുസൂക്ഷിക്കണമേ.
ഞങ്ങളുടെ മരണസമയത്തും അങ്ങയുടെ മാതൃസഹായം ഞങ്ങൾക്ക് തരണമേ. ഈശോമിശിഹായുടെ വാഗ്ദാനങ്ങൾക്ക് ഞങ്ങൾ യോഗ്യരാകുവാൻ, സർവ്വേശ്വരന്റെ പരിശുദ്ധ മാതാവേ, ഞങ്ങൾക്ക് വേണ്ടി പ്രാർത്ഥിക്കണമേ.
ഈശോയേ, അങ്ങയുടെ അമ്മ വഴി ഞങ്ങൾ സമർപ്പിച്ച ഈ പ്രാർത്ഥനകൾ കൈക്കൊണ്ട് ഞങ്ങളുടെ ഈ സന്ധ്യയെയും വരാനിരിക്കുന്ന രാത്രിയെയും അങ്ങയുടെ തിരുരക്തത്താൽ പൊതിഞ്ഞു സൂക്ഷിക്കണമേ.
പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ... ആമേൻ