പ്രായമാകുന്തോറും ദൈവത്തിലേക്ക് കൂടുതൽ അടുക്കുന്നത് എന്തുകൊണ്ട് ?
മനുഷ്യർ പ്രായമാകുമ്പോൾ ദൈവത്തിലേക്ക് അടുക്കുന്നത് മരണഭയത്താലാണെന്ന് പലരും കരുതാറുണ്ട്. എന്നാൽ യഥാർഥ കാരണം അതിലും മനോഹരമാണ്. ജീവിതാനുഭവങ്ങളിൽ നിന്ന് ലഭിക്കുന്ന തിരിച്ചറിവുകളാണ് പലരെയും ആത്മീയതയിലേക്ക് നയിക്കുന്നത്. പ്രായാധിക്യത്തിൽ ആളുകൾ ദൈവവിശ്വാസത്തിലേക്ക് തിരിയുന്നതിന്റെ പ്രധാനപ്പെട്ട അഞ്ചു കാരണങ്ങൾ എന്താണെന്ന് നോക്കാം.
1. നാം തിരിച്ചറിയുന്ന ജീവിതത്തിലെ അപ്രതീക്ഷിത മാറ്റങ്ങൾ
ചെറുപ്പത്തിൽ വെറും അപ്രതീക്ഷിതമെന്ന് കരുതിയ പല കാര്യങ്ങളും പ്രായമാകുമ്പോൾ ഒരു വലിയ പദ്ധതിയുടെ ഭാഗമാണെന്ന് തോന്നിത്തുടങ്ങും. അപ്രതീക്ഷിതമായ തിരിച്ചടികളും വലിയ നേട്ടങ്ങളും എങ്ങനെ ജീവിതത്തെ മാറ്റിമറിച്ചു എന്ന് പിന്നോട്ട് നോക്കുമ്പോൾ വ്യക്തമാകും. ഈ തിരിച്ചറിവ് ഒരു വലിയ ശക്തിയിൽ വിശ്വസിക്കാൻ അവരെ പ്രേരിപ്പിക്കുന്നു.
2. നന്ദിയുള്ളവരായി മാറുന്നു
ആരോഗ്യം, സൗഹൃദങ്ങൾ, ജീവിതത്തിലെ കൊച്ചു സന്തോഷങ്ങൾ എന്നിവയെല്ലാം വെറുതെ ലഭിക്കുന്നതല്ലെന്ന ബോധ്യം പ്രായമാകുമ്പോൾ വർധിക്കുന്നു. ജീവിതത്തിൽ ലഭിച്ച നന്മകളോടുള്ള ഈ നന്ദി സ്വാഭാവികമായും ദൈവത്തിലേക്കുള്ള വഴി തുറക്കുന്നു.
3. നിയന്ത്രണങ്ങൾ ഉപേക്ഷിക്കുന്നു
എല്ലാം സ്വന്തം അധ്വാനം കൊണ്ട് നിയന്ത്രിക്കാമെന്ന വാശി ചെറുപ്പത്തിൽ ഉണ്ടാകാറുണ്ട്. എന്നാൽ പ്രായമാകുമ്പോൾ പല കാര്യങ്ങളും നമ്മുടെ നിയന്ത്രണത്തിലല്ലെന്ന് നാം തിരിച്ചറിയുന്നു. ഈ വിട്ടുകൊടുക്കൽ മനസ്സിന് വലിയ സമാധാനം നൽകുകയും ദൈവത്തിലുള്ള വിശ്വാസം വർധിപ്പിക്കുകയും ചെയ്യുന്നു.
4. ആഴത്തിലുള്ള ബന്ധങ്ങൾ
പ്രായമാകുമ്പോൾ ബന്ധങ്ങളുടെ എണ്ണം കുറയുമെങ്കിലും അവയ്ക്ക് ആഴം കൂടും. സ്നേഹവും വിശ്വാസവും നിറഞ്ഞ ഇത്തരം ബന്ധങ്ങൾ ആത്മീയതയുമായി ചേർന്നുനിൽക്കുന്നവയാണ്. ആത്മീയത ഒറ്റപ്പെടൽ ഒഴിവാക്കാനും മറ്റുള്ളവരുമായി കൂടുതൽ അടുക്കാനും സഹായിക്കുന്നു.
5. ഉത്തരങ്ങളില്ലാത്ത ചോദ്യങ്ങളെ അംഗീകരിക്കുന്നു
എല്ലാ കാര്യങ്ങൾക്കും കൃത്യമായ ഉത്തരം വേണമെന്ന് വാശി പ്രായമാകുമ്പോൾ കുറയുന്നു. പൂർണ്ണമായ അറിവല്ല മറിച്ച് ഉറച്ച വിശ്വാസമാണ് ജീവിതത്തിന് അർഥം നൽകുന്നതെന്ന് അവർ തിരിച്ചറിയുന്നു.
പ്രായമാകുമ്പോൾ ദൈവത്തിലേക്ക് അടുക്കുന്നത് ജീവിതത്തിന്റെ അന്ത്യം അടുത്തതുകൊണ്ടല്ല മറിച്ച് ജീവിതത്തെ അതിന്റെ പൂർണ്ണതയിൽ മനസ്സിലാക്കുന്നത് കൊണ്ടാണ്. പ്രയാസകരമാണെങ്കിലും അർഥവത്തായ ഈ ജീവിതയാത്ര ഒടുവിൽ നമ്മെ എത്തിക്കുന്നത് ആ വലിയ സത്യത്തിലേക്കാണ്.
സീനിയ എൽസ ഇഗ്നേഷ്യസ്