കൂടുതൽ മക്കൾ നാടിന്റെ നന്മയ്ക്ക്
 

ജനസംഖ്യാ നിയന്ത്രണമല്ല, കുടുംബസംരക്ഷണമാണ് കാലഘട്ടത്തിന്റെ ആവശ്യം

ഒരു കാലത്ത് ജനസംഖ്യാ വർധനവായിരുന്നു ലോകത്തിന്റെ പ്രധാന ആശങ്ക. കൂടുതൽ കുട്ടികൾ ജനിക്കുന്നത് സാമ്പത്തിക ബാധ്യതയായും രാജ്യത്തിന്റെ വികസനത്തിന് തടസ്സമായും വിലയിരുത്തപ്പെട്ടിരുന്നു. എന്നാൽ കാലം മാറിയിരിക്കുന്നു. ഇന്ന് ലോകത്തിലെ നിരവധി രാജ്യങ്ങൾ നേരിടുന്ന വലിയ വെല്ലുവിളി ജനസംഖ്യാ വർധനവല്ല, ജനനനിരക്കിലെ ഇടിവും വയോജനങ്ങളുടെ വർധനവുമാണ്.

ഈ മാറുന്ന യാഥാർഥ്യത്തിലേക്ക് ശ്രദ്ധ ക്ഷണിക്കുന്നതാണ് ദീപിക ദിനപത്രത്തിന്റെ 'കൂടുതൽ മക്കൾ ഇനി പള്ളിക്കാര്യമല്ല' എന്ന മുഖപ്രസംഗം. കേരളവും ഇന്ത്യയും ഗൗരവമായി ചർച്ച ചെയ്യേണ്ട ഒരു സാമൂഹിക വിഷയമാണ് അതിലൂടെ ഉയർന്നുവന്നിരിക്കുന്നത്.

എന്നാൽ ഈ വിഷയത്തിന് കേരളത്തിൽ മറ്റൊരു ചരിത്രം കൂടിയുണ്ട്. ജനസംഖ്യാ നിയന്ത്രണ നിയമനിർമാണ നീക്കങ്ങൾക്കെതിരെ KCBC പ്രോ ലൈഫ് സമിതിയുടെ നേതൃത്വത്തിൽ നടന്ന ശക്തമായ പ്രതിഷേധങ്ങളും അതിനപ്പുറം വലിയ കുടുംബങ്ങളെ ആദരിക്കുകയും പ്രോത്സാഹിപ്പിക്കുകയും ചെയ്ത ജീവസമൃദ്ധി പദ്ധതിയും ഈ ചരിത്രത്തിന്റെ പ്രധാന ഭാഗങ്ങളാണ്.

ദീപികയുടെ മുഖപ്രസംഗം ഈ വിഷയത്തെ വീണ്ടും ചർച്ചയിലേക്ക് കൊണ്ടുവന്ന സാഹചര്യത്തിൽ, അന്നത്തെ പ്രവർത്തനങ്ങളുടെ ഭാഗമായിരുന്ന ഒരാൾ എന്ന നിലയിൽ ചില അനുഭവങ്ങളും ഓർമകളും പങ്കുവയ്ക്കാൻ ആഗ്രഹിക്കുന്നു.

### ജനസംഖ്യാ നയങ്ങൾ മാറേണ്ട സമയം

ഒരു കാലഘട്ടത്തിലെ സാഹചര്യങ്ങൾക്കനുസരിച്ച് രൂപപ്പെടുത്തിയ നിയമങ്ങളും നയങ്ങളും മറ്റൊരു കാലഘട്ടത്തിലും അതേപടി തുടരണമെന്നില്ല. ജനസംഖ്യാ നിയന്ത്രണത്തിനുവേണ്ടി രൂപപ്പെടുത്തിയ പല നിയമങ്ങളുടെയും പ്രസക്തി ഇന്ന് പുനഃപരിശോധിക്കേണ്ടതുണ്ട്.

രണ്ടിൽ കൂടുതൽ കുട്ടികളുള്ളവരെ തദ്ദേശസ്വയംഭരണ സ്ഥാപനങ്ങളിലേക്ക് മത്സരിക്കുന്നതിൽനിന്ന് അയോഗ്യരാക്കുന്ന നിയമങ്ങൾ ഇതിന് ഉദാഹരണമാണ്.

മഹാരാഷ്ട്രയിലെ രണ്ടിൽ കൂടുതൽ കുട്ടികളുള്ളവരുടെ തിരഞ്ഞെടുപ്പ് അയോഗ്യതയുമായി ബന്ധപ്പെട്ട കേസിൽ സുപ്രീംകോടതി നടത്തിയ ഇടപെടലും മുൻവിധി വിശാല ബെഞ്ചിന്റെ പരിഗണനയ്ക്ക് വിട്ടതും ഈ ചർച്ചയ്ക്ക് പുതിയ പ്രാധാന്യം നൽകുന്നു.

ജനസംഖ്യാ സാഹചര്യങ്ങൾ മാറുമ്പോൾ നിയമങ്ങളും മാറണം. കുട്ടികളുടെ എണ്ണം അടിസ്ഥാനമാക്കി ജനാധിപത്യപരമായ അവകാശങ്ങൾ പരിമിതപ്പെടുത്തുന്ന നിയമങ്ങളുടെ പ്രസക്തി പുനഃപരിശോധിക്കേണ്ട സമയമാണിത്.

### കേരളം നൽകുന്ന മുന്നറിയിപ്പ്

കേരളത്തിന്റെ ജനസംഖ്യാ സാഹചര്യം കൂടുതൽ ആശങ്കാജനകമാണ്. ജനനനിരക്കിലെ കുറവും വയോജനങ്ങളുടെ വർധനവും നമ്മുടെ സാമൂഹികവും സാമ്പത്തികവുമായ ഭാവിയെ ബാധിക്കുന്ന വിഷയങ്ങളാണ്.

2024-ൽ കേരളത്തിലെ ഏഴ് ജില്ലകളിൽ ജനനത്തേക്കാൾ മരണങ്ങൾ കൂടുതലായിരുന്നുവെന്ന കണക്ക് ഗൗരവമായി കാണണം.

ജനനനിരക്ക് കുറയുമ്പോൾ ഭാവിയിൽ തൊഴിൽശേഷിയുള്ള യുവജനങ്ങളുടെ എണ്ണം കുറയും. വയോജനങ്ങളുടെ അനുപാതം വർധിക്കും. ആരോഗ്യപരിപാലനം, പെൻഷൻ, സാമൂഹിക സുരക്ഷ, സാമ്പത്തിക ഉൽപ്പാദനക്ഷമത തുടങ്ങിയ മേഖലകളിൽ വലിയ സമ്മർദമുണ്ടാകും.

കേരളത്തിന്റെ ഭാവി വികസനത്തെക്കുറിച്ച് ചർച്ച ചെയ്യുമ്പോൾ ജനസംഖ്യയുടെ ഘടനയെയും കുടുംബങ്ങളുടെ നിലനിൽപ്പിനെയും അവഗണിക്കാനാവില്ല.

### ചരിത്രം മറക്കരുത്: ജസ്റ്റിസ് കൃഷ്ണയ്യർ ബില്ലും അന്നത്തെ പ്രതിഷേധവും

ഈ വിഷയത്തിൽ സംസാരിക്കുമ്പോൾ ജസ്റ്റിസ് വി.ആർ. കൃഷ്ണയ്യർ അധ്യക്ഷനായ കമ്മീഷൻ തയ്യാറാക്കിയ 2011-ലെ കേരള വനിതാ കോഡ് ബില്ലിന്റെ കരടിനെക്കുറിച്ച് പറയാതെ മുന്നോട്ടുപോകാനാവില്ല.

മൂന്നാമത്തെ കുട്ടിയുണ്ടാകുന്ന ദമ്പതികൾക്ക് മൂന്നു മാസം തടവും 10,000 രൂപ പിഴയും ഉൾപ്പെടെയുള്ള നിർദേശങ്ങൾ ആ കരടിലുണ്ടായിരുന്നു.

കേരളത്തിലെ കുടുംബജീവിതത്തെയും വ്യക്തിസ്വാതന്ത്ര്യത്തെയും ബാധിക്കുന്ന ഈ നിയമനിർമാണ നീക്കത്തിനെതിരെ അന്ന് വിവിധ തലങ്ങളിൽ പ്രതികരണങ്ങൾ ഉയർന്നു. എന്നാൽ രാഷ്ട്രീയ പാർട്ടികളിൽനിന്നും മതസമൂഹങ്ങളിൽനിന്നും പ്രതീക്ഷിച്ച തരത്തിലുള്ള ശക്തമായ പ്രതിഷേധം ഉണ്ടായില്ലെന്നത് ഞങ്ങളുടെ അന്നത്തെ അനുഭവമാണ്.

എന്തുകൊണ്ടാണ് പലരും മൗനം പാലിച്ചത് എന്നത് വ്യക്തമല്ല. ചില രാഷ്ട്രീയ പാർട്ടികളും മുന്നണികളും ഈ നിയമനിർമാണ നീക്കത്തെ പിന്തുണയ്ക്കാൻ തയ്യാറായിരുന്നതും ഓർക്കുന്നു.

എന്നാൽ KCBC പ്രോ ലൈഫ് സമിതിയുടെ നേതൃത്വത്തിൽ ശക്തമായ പ്രതിഷേധം ഉയർന്നു. കുടുംബങ്ങളുടെ അവകാശങ്ങൾക്കും കുട്ടികളുടെ ജനിക്കാനുള്ള അവകാശത്തിനും വേണ്ടി പ്രോ ലൈഫ് പ്രവർത്തകർ തെരുവിലിറങ്ങി.

അന്നത്തെ പ്രതിഷേധങ്ങൾ ഇന്നും മനസ്സിൽ തെളിഞ്ഞുനിൽക്കുന്നു.

നട്ടുച്ചയ്ക്ക് റാന്തൽവിളക്കുകളുമായി തിരുവനന്തപുരത്ത് കുട്ടികളോടൊപ്പം പ്രോ ലൈഫ് കുടുംബങ്ങൾ നടത്തിയ പ്രകടനം ശ്രദ്ധേയമായിരുന്നു. പകൽ സമയത്ത് റാന്തൽവിളക്കുമായി നടത്തിയ ആ പ്രകടനം വലിയൊരു പ്രതീകാത്മക സന്ദേശമായിരുന്നു. കുടുംബങ്ങൾക്കും കുട്ടികൾക്കും അനുകൂലമായ സാമൂഹിക വെളിച്ചം തെളിയിക്കണമെന്ന ആഹ്വാനമായിരുന്നു അത്.

കൊച്ചി, തൃശൂർ തുടങ്ങിയ നഗരങ്ങളിലും പ്രതിഷേധ സമ്മേളനങ്ങൾ നടന്നു. ഈ പരിപാടികളിൽ കത്തോലിക്കാ മെത്രാന്മാർ പങ്കെടുത്തു. POC-യുടെ മുന്നിൽ ബില്ലിന്റെ കോപ്പി കത്തിച്ചുകൊണ്ടുള്ള പ്രതിഷേധവും സംഘടിപ്പിച്ചു.

അക്കാലത്ത് ഇത്തരം പ്രതിഷേധ പരിപാടികൾക്ക് നേതൃത്വം നൽകാനും അവയുടെ ഭാഗമാകാനും കഴിഞ്ഞതിൽ ഇന്നും ഞങ്ങൾക്ക് സന്തോഷവും അഭിമാനവുമുണ്ട്.

അത് ഒരു ബില്ലിനെതിരായ പ്രതിഷേധം മാത്രമായിരുന്നില്ല. കുടുംബങ്ങളുടെ സ്വാതന്ത്ര്യത്തിനും മാതാപിതാക്കളുടെ അവകാശങ്ങൾക്കും കുട്ടികളുടെ മാനവിക അന്തസ്സിനും വേണ്ടിയുള്ള നിലപാടായിരുന്നു.

### പ്രതിഷേധത്തിനപ്പുറം ഞങ്ങൾ മുന്നോട്ടുവച്ചത് ജീവസമൃദ്ധി

എന്നാൽ ഞങ്ങളുടെ പ്രവർത്തനം പ്രതിഷേധങ്ങളിൽ മാത്രം ഒതുങ്ങിയില്ല.

കൂടുതൽ കുട്ടികളുള്ള കുടുംബങ്ങളെ ആദരിക്കുകയും അവരുടെ നന്മകളും സന്തോഷവും സമൂഹത്തിന് നൽകുന്ന സംഭാവനകളും പൊതുസമൂഹത്തിനു മുന്നിൽ അവതരിപ്പിക്കുകയും ചെയ്യേണ്ടതിന്റെ ആവശ്യകത ഞങ്ങൾ തിരിച്ചറിഞ്ഞു.

ഇതിന്റെ ഭാഗമായിട്ടാണ് KCBC പ്രോ ലൈഫ് സമിതിയുടെ നേതൃത്വത്തിൽ 2011-ൽ 'ജീവസമൃദ്ധി' പദ്ധതി ആദ്യമായി നടപ്പിലാക്കിയത്.

കൊച്ചിയിൽ നടന്ന പ്രഥമ ജീവസമൃദ്ധി പരിപാടി കർദിനാൾ മാർ ജോർജ് ആലഞ്ചേരി ഉദ്ഘാടനം ചെയ്തു. ചെയർമാൻ മാർ മാത്യു ആനിക്കുഴിക്കാട്ടിൽ പദ്ധതിക്ക് നേതൃത്വം നൽകി.

ഫാ. ജോസ് കോട്ടയിൽ, ഫാ. റോബി കണ്ണഞ്ചിറ CMI, ജോർജ് എഫ്. സേവ്യർ, ജേക്കബ് പള്ളിവാതുക്കൽ, സിസ്റ്റർ മേരി ജോർജ് FCC, ജോൺസൻ സി. അബ്രഹാം... തുടങ്ങിയവരുടെ സജീവമായ നേതൃത്വവും സഹകരണവും ഈ സംരംഭത്തിന് കരുത്തേകി.

അന്നത്തെ കൂട്ടായ പ്രവർത്തനവും സമർപ്പണവുമാണ് ജീവസമൃദ്ധിയെ ഒരു ആശയത്തിൽനിന്ന് ജനകീയ പ്രസ്ഥാനമായി വളർത്താൻ സഹായിച്ചത്.

പ്രത്യേകിച്ച്, അന്ന് ഈ പദ്ധതിയുടെ ഭാഗമായിരുന്ന ജോൺസൻ സി. അബ്രഹാം ഇന്ന് KCBC പ്രോ ലൈഫ് സമിതിയുടെ പ്രസിഡന്റായി പ്രവർത്തിക്കുന്നു എന്നതും സന്തോഷത്തോടെ ഓർക്കുന്നു. അന്നത്തെ പ്രവർത്തനങ്ങളുടെ തുടർച്ചയായി പുതിയ നേതൃത്വത്തിലൂടെ പ്രോ ലൈഫ് ദൗത്യം മുന്നോട്ടുപോകുന്നത് പ്രതീക്ഷ നൽകുന്നു.

വലിയ കുടുംബങ്ങളെ ആദരിക്കുക, അവരുടെ ജീവിതാനുഭവങ്ങൾ സമൂഹത്തിനു മുന്നിൽ അവതരിപ്പിക്കുക, കുടുംബബന്ധങ്ങളുടെ സൗന്ദര്യവും പരസ്പര സ്നേഹവും പങ്കുവയ്ക്കലും കുട്ടികൾ സമൂഹത്തിന് നൽകുന്ന മികവുകളും ജനങ്ങളിലേക്ക് എത്തിക്കുക എന്നിവയായിരുന്നു പദ്ധതിയുടെ പ്രധാന ലക്ഷ്യങ്ങൾ.

കേരളത്തിലെ പ്രധാന നഗരങ്ങളിൽ വലിയ കുടുംബങ്ങളെ പങ്കെടുപ്പിച്ചുകൊണ്ട് സമ്മേളനങ്ങളും ആദരിക്കൽ പരിപാടികളും സംഘടിപ്പിച്ചു.

ഈ പരിപാടികൾ മാധ്യമങ്ങൾ വലിയ വാർത്താപ്രാധാന്യത്തോടെ അവതരിപ്പിച്ചു. വലിയ കുടുംബങ്ങളെക്കുറിച്ചുള്ള പൊതുസമൂഹത്തിന്റെ കാഴ്ചപ്പാടിൽ മാറ്റമുണ്ടാക്കാനും കേരള കത്തോലിക്കാ സഭയിൽ പുതിയൊരു ഉണർവ് സൃഷ്ടിക്കാനും ജീവസമൃദ്ധിക്ക് കഴിഞ്ഞു.

വലിയ കുടുംബം എന്നത് സാമ്പത്തിക ബാധ്യതകളുടെയും പ്രയാസങ്ങളുടെയും മാത്രം ചിത്രമല്ലെന്നും സ്നേഹത്തിന്റെയും സന്തോഷത്തിന്റെയും പങ്കുവയ്ക്കലിന്റെയും പരസ്പര കരുതലിന്റെയും അനുഭവമാണെന്നും സമൂഹത്തെ ബോധ്യപ്പെടുത്താൻ ഈ പദ്ധതിക്ക് സാധിച്ചു.

ജീവസമൃദ്ധി കേരളസഭയിൽ സൃഷ്ടിച്ച വലിയ കുടുംബങ്ങളെക്കുറിച്ചുള്ള അനുകൂല കാഴ്ചപ്പാട് ഇന്നും വിവിധ കുടുംബപ്രോത്സാഹന പ്രവർത്തനങ്ങളിലൂടെ തുടരുന്നു എന്നത് ഏറെ സന്തോഷകരമാണ്.

### ജീവസമൃദ്ധിയുടെ രണ്ട് സന്ദേശങ്ങൾ

ജീവസമൃദ്ധി പദ്ധതിയുടെ ചീഫ് കോ-ഓർഡിനേറ്റർ എന്ന നിലയിൽ ഞാൻ മുന്നോട്ടുവച്ച രണ്ട് പ്രധാന സന്ദേശങ്ങൾ ഇന്നും ഓർമിക്കുന്നു.

1\. കൂടുതൽ കുട്ടികൾ നാടിന്റെ നന്മയ്ക്ക്.

2\. വലിയ കുടുംബം സന്തുഷ്ട കുടുംബം.

ഈ രണ്ട് സന്ദേശങ്ങളും വെറും മുദ്രാവാക്യങ്ങളായിരുന്നില്ല. കേരളത്തിന്റെ ജനസംഖ്യാ ഭാവിയെക്കുറിച്ചുള്ള ദീർഘവീക്ഷണവും കുടുംബജീവിതത്തിന്റെ മഹത്വത്തെക്കുറിച്ചുള്ള ഉറച്ച ബോധ്യവുമായിരുന്നു അവയുടെ അടിസ്ഥാനം.

അന്ന് ഈ സന്ദേശങ്ങൾ അവതരിപ്പിച്ചപ്പോൾ പലരും സംശയങ്ങൾ ഉന്നയിച്ചു. ഇത്തരമൊരു ആശയം മുന്നോട്ടുവയ്ക്കേണ്ടതുണ്ടോ എന്ന് ചോദിച്ചവരും വിമർശിച്ചവരും ഉണ്ടായിരുന്നു.

എന്നാൽ കാലത്തിന്റെ മാറ്റങ്ങളും ജനസംഖ്യാ യാഥാർഥ്യങ്ങളും കൂടുതൽ കുട്ടികളുടെ സാമൂഹിക പ്രാധാന്യവും പരിഗണിച്ചായിരുന്നു ഞങ്ങൾ ഈ നിലപാട് സ്വീകരിച്ചത്.

ഇന്ന് കേന്ദ്രസർക്കാരിന്റെ തലത്തിൽ ജനസംഖ്യാ ഇടിവും കുടുംബപ്രോത്സാഹനവും ചർച്ചയാകുകയും സുപ്രീംകോടതിയിൽ രണ്ടിൽ കൂടുതൽ കുട്ടികളുള്ളവരുടെ തിരഞ്ഞെടുപ്പ് അയോഗ്യത സംബന്ധിച്ച നിയമങ്ങളുടെ പ്രസക്തി പുനഃപരിശോധനയ്ക്ക് വരികയും ചെയ്യുമ്പോൾ അന്ന് ഞങ്ങൾ മുന്നോട്ടുവച്ച ദർശനത്തിന്റെ പ്രസക്തി കൂടുതൽ വ്യക്തമാകുന്നു.

അന്ന് സംശയിക്കുകയും വിമർശിക്കുകയും ചെയ്തവർക്ക് മുന്നിൽ ഇന്ന് ഈ വിഷയങ്ങൾ ദേശീയതലത്തിൽ ഗൗരവമായി ചർച്ച ചെയ്യപ്പെടുന്നത് കാണുമ്പോൾ ഏറെ സന്തോഷമുണ്ട്.

കാലത്തിനുമുമ്പേ തിരിച്ചറിഞ്ഞ ഒരു സാമൂഹിക ആവശ്യത്തെക്കുറിച്ചുള്ള ചർച്ച ഇന്ന് കൂടുതൽ പ്രസക്തമാകുന്നു എന്നതാണ് പ്രധാനം.

### നന്ദിയോടെ സ്മരിക്കുന്ന ചാവറ ഫാമിലി വെൽഫെയർ സെന്റർ

KCBC പ്രോ ലൈഫ് സമിതിയുടെ ജീവസമൃദ്ധി പദ്ധതിക്ക് ആത്മാർഥമായ പ്രോത്സാഹനവും പിന്തുണയും നൽകിയ കൊച്ചി ചാവറ ഫാമിലി വെൽഫെയർ സെന്ററിനെ ഈ അവസരത്തിൽ നന്ദിയോടെ സ്മരിക്കുന്നു.

വലിയ കുടുംബങ്ങളുടെ മഹത്വവും സന്തോഷവും സമൂഹത്തിൽ അവതരിപ്പിക്കുന്ന ഈ ദൗത്യത്തിന് ലഭിച്ച പിന്തുണ ഏറെ വിലപ്പെട്ടതായിരുന്നു.

ഒരു ആശയത്തെ ജനകീയ പ്രവർത്തനമാക്കി വളർത്തുന്നതിന് സ്ഥാപനങ്ങളുടെ സഹകരണവും കൂട്ടായ പ്രവർത്തനവും എത്രത്തോളം പ്രധാനമാണെന്ന് ജീവസമൃദ്ധിയുടെ അനുഭവം വ്യക്തമാക്കുന്നു.

ജീവസമൃദ്ധി ഒരു പരിപാടിയുടെ പേരിൽ ഒതുങ്ങേണ്ടതല്ല. വലിയ കുടുംബങ്ങളെ ആദരിക്കുകയും കുട്ടികളെ സ്വാഗതം ചെയ്യുകയും കുടുംബജീവിതത്തെ പ്രോത്സാഹിപ്പിക്കുകയും ചെയ്യുന്ന ഒരു സാമൂഹിക സംസ്കാരമായി അത് തുടരണം.

### ലോകം മാറുന്നു; ഇന്ത്യയും മാറണം

ഒരുകാലത്ത് കർശനമായ ജനനനിയന്ത്രണ നയങ്ങൾ സ്വീകരിച്ച ചൈന ഇന്ന് ജനസംഖ്യാ ഇടിവിന്റെ പ്രത്യാഘാതങ്ങൾ നേരിടുകയാണ്. കൂടുതൽ കുട്ടികളുള്ള കുടുംബങ്ങളെ പ്രോത്സാഹിപ്പിക്കുന്നതിനായി സാമ്പത്തിക സഹായങ്ങളും നികുതിയിളവുകളും വിവിധ ക്ഷേമപദ്ധതികളും നടപ്പാക്കുന്ന സാഹചര്യമാണ് അവിടെയുള്ളത്.

ജപ്പാൻ, ദക്ഷിണകൊറിയ, യൂറോപ്യൻ രാജ്യങ്ങൾ എന്നിവിടങ്ങളിലും ജനനനിരക്ക് വർധിപ്പിക്കുന്നതിനുള്ള നടപടികൾ സ്വീകരിച്ചുവരുന്നു.

ഇവിടെനിന്ന് ഇന്ത്യ പഠിക്കേണ്ട പാഠം വ്യക്തമാണ്. ജനസംഖ്യാ നിയന്ത്രണത്തെക്കുറിച്ചുള്ള പഴയ ചിന്താഗതികളിൽനിന്ന് മാറി കുടുംബങ്ങളെ ശക്തിപ്പെടുത്തുന്ന നയങ്ങളിലേക്ക് കടക്കണം.

### വലിയ കുടുംബങ്ങൾക്ക് സർക്കാർ പിന്തുണ നൽകണം

കൂടുതൽ കുട്ടികളുള്ള കുടുംബങ്ങളെ പ്രോത്സാഹിപ്പിക്കണമെന്നത് വെറും മുദ്രാവാക്യമായി മാറരുത്. അതിനാവശ്യമായ സാമ്പത്തികവും സാമൂഹികവുമായ പിന്തുണ ഉറപ്പാക്കണം.

വിദ്യാഭ്യാസച്ചെലവ്, ചികിത്സ, ഭവനം, ഭക്ഷണം, കുട്ടികളുടെ പരിപാലനം എന്നിവ വലിയ സാമ്പത്തിക ബാധ്യതകളാണ്. ഈ ബാധ്യതകൾ കുറയ്ക്കാൻ സർക്കാരിന് വ്യക്തമായ പദ്ധതികൾ വേണം.

പരിഗണിക്കേണ്ട പ്രധാന നിർദേശങ്ങൾ:

* കൂടുതൽ കുട്ടികളുള്ള സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് പ്രത്യേക സാമ്പത്തിക സഹായം.

* കുട്ടികളുടെ വിദ്യാഭ്യാസത്തിന് പ്രത്യേക സ്കോളർഷിപ്പുകൾ.

* മാതൃ-ശിശു ആരോഗ്യപരിരക്ഷയും പ്രസവാനുകൂല്യങ്ങളും.

* കുടുംബങ്ങൾക്ക് നികുതിയിളവുകൾ.

* ഭവനവായ്പകളിലും സാമൂഹിക സുരക്ഷാ പദ്ധതികളിലും പ്രത്യേക പരിഗണന.

* ജോലി ചെയ്യുന്ന മാതാപിതാക്കൾക്ക് ശിശുപരിപാലന സൗകര്യങ്ങൾ.

* ഉത്തരവാദിത്വമുള്ള മാതാപിതൃത്വത്തെയും കുടുംബജീവിതത്തെയും പ്രോത്സാഹിപ്പിക്കുന്ന ബോധവൽക്കരണ പരിപാടികൾ.

ഇത്തരം പദ്ധതികൾ എല്ലാ മതവിഭാഗങ്ങളിലുമുള്ള കുടുംബങ്ങൾക്കും പ്രയോജനപ്പെടുന്ന രീതിയിൽ നടപ്പാക്കണം.

### സഭകൾ സർക്കാർ പദ്ധതികൾക്കായി കാത്തിരിക്കരുത്

വലിയ കുടുംബങ്ങളെയും കുടുംബജീവിതത്തെയും പ്രോത്സാഹിപ്പിക്കേണ്ടത് സർക്കാരിന്റെ മാത്രം ഉത്തരവാദിത്വമല്ല. കേരളത്തിലെ കത്തോലിക്കാ സഭയും ഇതര ക്രൈസ്തവ സഭകളും ഈ വിഷയത്തിൽ കൂടുതൽ ക്രിയാത്മകമായ ഇടപെടലുകൾ നടത്തേണ്ട സമയമാണിത്.

സർക്കാരിന്റെ സഹായപദ്ധതികൾ വരുന്നതും പുതിയ നയങ്ങൾ രൂപപ്പെടുന്നതും കാത്തിരുന്ന് പ്രവർത്തനങ്ങൾ നീട്ടിവയ്ക്കരുത്.

ഓരോ രൂപതയും സ്വന്തം സാഹചര്യങ്ങൾ വിലയിരുത്തി വ്യക്തമായ കുടുംബപ്രോത്സാഹന കർമപദ്ധതികൾ തയ്യാറാക്കണം. ഓരോ ഇടവകയും കുടുംബങ്ങളുടെ ആവശ്യങ്ങൾ മനസ്സിലാക്കി പ്രായോഗികമായ പദ്ധതികൾ നടപ്പാക്കണം.

ഇതിനായി താഴെ പറയുന്ന പ്രവർത്തനങ്ങൾ പരിഗണിക്കാവുന്നതാണ്:

* വലിയ കുടുംബങ്ങളെ ആദരിക്കുകയും അവരുടെ അനുഭവങ്ങൾ പങ്കുവയ്ക്കുകയും ചെയ്യുക.

* സാമ്പത്തികമായി ബുദ്ധിമുട്ടുന്ന വലിയ കുടുംബങ്ങൾക്ക് പ്രത്യേക സഹായനിധി രൂപീകരിക്കുക.

* കുട്ടികളുടെ വിദ്യാഭ്യാസത്തിനും ആരോഗ്യപരിരക്ഷയ്ക്കും പിന്തുണ നൽകുക.

* വിവാഹത്തിനും കുടുംബജീവിതത്തിനും യുവജനങ്ങളെ ഉത്തരവാദിത്വത്തോടെ ഒരുക്കുക.

* ദമ്പതികൾക്ക് കുടുംബജീവിത കൗൺസിലിംഗും മാതാപിതൃ പരിശീലനവും നൽകുക.

* കുട്ടികളോടും മാതാപിതാക്കളോടും അനുകൂലമായ ഇടവകാന്തരീക്ഷം സൃഷ്ടിക്കുക.

* ഒറ്റപ്പെട്ടുപോകുന്ന കുടുംബങ്ങൾക്ക് സാമൂഹികവും ആത്മീയവുമായ പിന്തുണ ഉറപ്പാക്കുക.

ഇത്തരം പ്രവർത്തനങ്ങൾ ക്രൈസ്തവ സമൂഹത്തിൽ മാത്രം ഒതുങ്ങേണ്ടതില്ല. കുടുംബങ്ങളുടെ ക്ഷേമത്തിനായി എല്ലാ മതവിഭാഗങ്ങളുമായും സഹകരിച്ച് പ്രവർത്തിക്കാനും സഭകൾക്ക് കഴിയും.

2011-ൽ ജീവസമൃദ്ധിയിലൂടെ നാം മുന്നോട്ടുവച്ച ആശയം ഇന്ന് ഓരോ രൂപതയിലും ഇടവകയിലും പ്രായോഗികമായി നടപ്പാക്കാനുള്ള സമയമാണിത്.

### സർക്കാർ പ്രോ ലൈഫ് കമ്മീഷന് രൂപം നൽകണം

കുടുംബസംരക്ഷണവും ജനസംഖ്യാ സന്തുലിതാവസ്ഥയും കുട്ടികളുടെ ക്ഷേമവും മാതൃത്വത്തിന്റെ സംരക്ഷണവും ദേശീയ വികസനത്തിന്റെ പ്രധാന വിഷയങ്ങളായി മാറണം.

ഇതിനായി കേന്ദ്ര-സംസ്ഥാന സർക്കാരുകൾക്ക് മുന്നിൽ ഒരു പ്രധാന നിർദേശം കൂടി വയ്ക്കുകയാണ്: സർക്കാർ ഔദ്യോഗികമായി ഒരു പ്രോ ലൈഫ് കമ്മീഷൻ രൂപീകരിക്കണം.

ജനിക്കുന്നതിന് മുമ്പുള്ള കുഞ്ഞിന്റെ സംരക്ഷണം മുതൽ മാതൃ-ശിശു ആരോഗ്യപരിരക്ഷ, കുടുംബക്ഷേമം, കുട്ടികളുടെ അവകാശങ്ങൾ, വയോജനസംരക്ഷണം, ജനസംഖ്യാ പ്രവണതകൾ തുടങ്ങിയ വിഷയങ്ങൾ സമഗ്രമായി പഠിച്ച് ശുപാർശകൾ സമർപ്പിക്കാൻ ഈ കമ്മീഷന് കഴിയണം.

വിവിധ മേഖലകളിലെ വിദഗ്ധർ, സാമൂഹിക പ്രവർത്തകർ, ആരോഗ്യരംഗത്തെ പ്രതിനിധികൾ, നിയമവിദഗ്ധർ, കുടുംബക്ഷേമ പ്രവർത്തകർ എന്നിവരെ ഉൾപ്പെടുത്തി സ്വതന്ത്രവും ഉത്തരവാദിത്വമുള്ളതുമായ സംവിധാനമായി ഇത് രൂപീകരിക്കണം.

പ്രോ ലൈഫ് എന്നത് ജനനത്തിന് മുമ്പുള്ള കുഞ്ഞിന്റെ സംരക്ഷണത്തിൽ മാത്രം ഒതുങ്ങുന്ന ആശയമല്ല. ഗർഭധാരണം മുതൽ ജനനം, വളർച്ച, വിദ്യാഭ്യാസം, ആരോഗ്യം, കുടുംബജീവിതം, വാർധക്യം തുടങ്ങി മനുഷ്യജീവിതത്തിന്റെ എല്ലാ ഘട്ടങ്ങളെയും ആദരിക്കുകയും സംരക്ഷിക്കുകയും ചെയ്യുന്ന സമഗ്രമായ ജീവിതദർശനമാണ്.

അതുകൊണ്ടുതന്നെ ഒരു പ്രോ ലൈഫ് കമ്മീഷൻ രൂപീകരിക്കുന്നത് കാലഘട്ടത്തിന്റെ ആവശ്യമാണ്.

### കുട്ടികൾ ഒരു ചെലവല്ല, സമൂഹത്തിന്റെ നിക്ഷേപമാണ്

ഇന്ന് കുട്ടികളെ വളർത്തുന്നതിനുള്ള ചെലവുകൾ വർധിച്ചിരിക്കുന്നു. വിദ്യാഭ്യാസം, തൊഴിൽ, ജീവിതസൗകര്യങ്ങൾ എന്നിവയെക്കുറിച്ചുള്ള ആശങ്കകൾ പല കുടുംബങ്ങളെയും കൂടുതൽ കുട്ടികൾ വേണ്ടെന്ന തീരുമാനത്തിലേക്ക് നയിക്കുന്നു.

എന്നാൽ കുട്ടികളെ കേവലം സാമ്പത്തിക ബാധ്യതയായി കാണാൻ കഴിയില്ല. ഓരോ കുട്ടിയും ഒരു മനുഷ്യജീവിതമാണ്. ഭാവിയിലെ സമൂഹത്തിന്റെ ഭാഗമാണ്. മനുഷ്യവിഭവശേഷിയുടെയും സാമൂഹിക തുടർച്ചയുടെയും അടിസ്ഥാനമാണ്.

സ്ത്രീകളുടെ വിദ്യാഭ്യാസവും തൊഴിൽ അവകാശങ്ങളും സംരക്ഷിച്ചുകൊണ്ടുതന്നെ മാതൃത്വത്തിനും കുടുംബജീവിതത്തിനും അനുകൂലമായ സാഹചര്യം ഒരുക്കണം. ദമ്പതികളുടെ ഉത്തരവാദിത്വപൂർണമായ തീരുമാനങ്ങളെ ആദരിക്കുകയും അവർക്കാവശ്യമായ പിന്തുണ നൽകുകയും വേണം.

### പുതിയൊരു കുടുംബദർശനം ആവശ്യമാണ്

വികസനം എന്നത് റോഡുകളും കെട്ടിടങ്ങളും വ്യവസായങ്ങളും മാത്രമല്ല. മനുഷ്യരുടെ ജീവിതനിലവാരം, കുടുംബങ്ങളുടെ സുരക്ഷ, കുട്ടികളുടെ ഭാവി, വയോജനങ്ങളുടെ സംരക്ഷണം എന്നിവയും വികസനത്തിന്റെ അളവുകോലുകളാണ്.

ജനസംഖ്യാ നിയന്ത്രണത്തിന്റെ പഴയ കാഴ്ചപ്പാടുകളിൽനിന്ന് മാറി കുടുംബത്തെ കേന്ദ്രമാക്കിയുള്ള പുതിയ വികസനദർശനം ഇന്ത്യയ്ക്ക് ആവശ്യമാണ്.

വലിയ കുടുംബങ്ങളെ പരിഹസിക്കുകയോ നിരുത്സാഹപ്പെടുത്തുകയോ ചെയ്യാതെ അവരെ ആദരിക്കുകയും സഹായിക്കുകയും ചെയ്യുന്ന സാമൂഹിക മനോഭാവം വളരണം.

ദീപികയുടെ മുഖപ്രസംഗം ഉയർത്തിയ ഈ ചർച്ച കേരളത്തിന്റെ പൊതുസമൂഹത്തിലും രാഷ്ട്രീയ നേതൃത്വത്തിലും നയരൂപീകരണ വേദികളിലും കൂടുതൽ സജീവമാകണം.

അതിനൊപ്പം, ഈ വിഷയത്തിൽ കേരളത്തിൽ നേരത്തെ നടന്ന പ്രോ ലൈഫ് പ്രവർത്തനങ്ങളെയും ജീവസമൃദ്ധി പോലുള്ള ക്രിയാത്മക പദ്ധതികളെയും ചരിത്രത്തിന്റെ ഭാഗമായി ഓർക്കുകയും വിലയിരുത്തുകയും വേണം.

2011-ൽ കൊച്ചിയിൽ തുടക്കം കുറിച്ച ജീവസമൃദ്ധി ഒരു കാലഘട്ടത്തിന്റെ ആശയമായിരുന്നു. ഇന്ന് അത് പുതിയ കാലത്തിന്റെ ആവശ്യമായി മാറിയിരിക്കുന്നു. അന്നത്തെ നേതൃത്വവും പ്രവർത്തകരും മുന്നോട്ടുവച്ച ദർശനം കൂടുതൽ വിപുലമായ സാമൂഹിക പ്രവർത്തനങ്ങളിലൂടെ മുന്നോട്ടുകൊണ്ടുപോകേണ്ടത് നമ്മുടെ ഉത്തരവാദിത്വമാണ്.

അന്ന് ഞങ്ങൾ ഉയർത്തിയ രണ്ട് സന്ദേശങ്ങൾ ഇന്നും പ്രസക്തമാണ്:

കൂടുതൽ കുട്ടികൾ നാടിന്റെ നന്മയ്ക്ക്.

വലിയ കുടുംബം സന്തുഷ്ട കുടുംബം.

കുട്ടികളെ കുറയ്ക്കുന്നതല്ല വികസനം; ഓരോ കുട്ടിക്കും സുരക്ഷിതമായ ഭാവി ഒരുക്കുന്നതാണ് യഥാർഥ വികസനം. കുടുംബങ്ങളെ ശക്തിപ്പെടുത്തുന്ന സമൂഹത്തിനേ ഭാവിതലമുറയെ സുരക്ഷിതമായി വളർത്താൻ കഴിയൂ.

*സാബു ജോസ്*
9446329343

See less