കുട്ടി ഭക്ഷണം കഴിക്കാൻ മടിക്കുന്നോ? ഇത് വെറും വാശിയല്ല, അസുഖമാവാം

കുട്ടികൾ ചില ഭക്ഷണങ്ങൾ കഴിക്കാൻ മടി കാണിക്കുന്നത് സാധാരണമാണ്. എന്നാൽ ചില കുട്ടികളിൽ ഇത് വെറും വാശിയല്ല, മറിച്ച് ‘ആർഫിഡ്’ (ARFID) എന്ന് വിളിക്കുന്ന ഒരു തരം ഭക്ഷണ വൈകല്യമാകാൻ സാധ്യതയുണ്ട്. ഭക്ഷണത്തിന്റെ മണം, നിറം, അല്ലെങ്കിൽ അതിന്റെ പ്രത്യേകതകൾ കാരണം ചിലർക്ക് അത് കഴിക്കാൻ കടുത്ത പേടിയോ മടിയോ അനുഭവപ്പെടാം. ഇത് കുട്ടികളുടെ വളർച്ചയെയും ആരോഗ്യത്തെയും ദോഷകരമായി ബാധിച്ചേക്കാം.

എന്താണ് ഈ അവസ്ഥ?

നമ്മൾ സാധാരണ കാണുന്ന ‘വാശി’യിൽ നിന്നും വ്യത്യസ്തമാണ് ഇത്. ഈ പ്രശ്നമുള്ള കുട്ടികൾക്ക് ചില ഭക്ഷണങ്ങൾ കാണുമ്പോഴോ മണക്കുമ്പോഴോ ശർദ്ദിക്കാൻ വരികയോ ശ്വാസം മുട്ടുന്നത് പോലെ തോന്നുകയോ ചെയ്യാം. വണ്ണം കുറയുമെന്ന പേടിയല്ല, മറിച്ച് ആ ഭക്ഷണം കഴിച്ചാൽ എന്തെങ്കിലും അപകടം സംഭവിക്കുമോ എന്ന ഭയമാണ് ഇവരെ ഇതിൽ നിന്ന് പിന്തിരിപ്പിക്കുന്നത്. പലപ്പോഴും പച്ചക്കറികളോ പഴങ്ങളോ പുതിയ തരം ഭക്ഷണങ്ങളോ കഴിക്കാൻ ഇവർ തയ്യാറാകില്ല. ഇത് കുട്ടികളിൽ പോഷകാഹാരക്കുറവിനും ക്ഷീണത്തിനും കാരണമാകുന്നു.

മാതാപിതാക്കൾ ശ്രദ്ധിക്കേണ്ട കാര്യങ്ങൾ

കുട്ടികൾ ഭക്ഷണം കഴിക്കാത്തപ്പോൾ അവരെ വഴക്ക് പറയുന്നതിനോ നിർബന്ധിക്കുന്നതിനോ പകരം അത് എന്തുകൊണ്ടാണെന്ന് മനസ്സിലാക്കാൻ ശ്രമിക്കണം.

ചില പ്രത്യേക നിറമുള്ളതോ മണമുള്ളതോ ആയ ഭക്ഷണങ്ങൾ തീരെ കഴിക്കാതിരിക്കുക.

ഭക്ഷണം ചവയ്ക്കാൻ ബുദ്ധിമുട്ട് കാണിക്കുക.

പുതിയ ഭക്ഷണങ്ങൾ കാണുമ്പോൾ അമിതമായ ഉത്കണ്ഠ പ്രകടിപ്പിക്കുക.
ഇത്തരം ലക്ഷണങ്ങൾ കണ്ടാൽ വിദഗ്ധരായ ഡോക്ടർമാരുടെയോ സൈക്കോളജിസ്റ്റുകളുടെയോ സഹായം തേടുന്നത് നല്ലതാണ്.

എങ്ങനെ മാറ്റിയെടുക്കാം?

ഭക്ഷണക്രമത്തിൽ പടിപടിയായി മാറ്റങ്ങൾ വരുത്തിയാണ് ഈ പ്രശ്നം പരിഹരിക്കുന്നത്. കുട്ടികൾക്ക് ഇഷ്ടമുള്ള ഭക്ഷണത്തോടൊപ്പം ഇഷ്ടമില്ലാത്തവ ചെറിയ അളവിൽ ചേർത്ത് നൽകി ശീലിപ്പിക്കാം. ഉദാഹരണത്തിന്, തൈര് ഇഷ്ടമുള്ള കുട്ടിക്ക് അതിൽ അല്പം പഴങ്ങൾ ചേർത്ത് നൽകി നോക്കാം. മാതാപിതാക്കൾ ക്ഷമയോടെ കൂടെ നിൽക്കുന്നത് കുട്ടികൾക്ക് ആത്മവിശ്വാസം നൽകും. ശരിയായ ചികിൽസയിലൂടെയും സ്നേഹപൂർണ്ണമായ സമീപനത്തിലൂടെയും മിക്ക കുട്ടികളെയും ഈ അവസ്ഥയിൽ നിന്ന് മാറ്റിയെടുക്കാൻ സാധിക്കും.

ഭക്ഷണം കഴിക്കുന്നത് കുട്ടികൾക്ക് ഒരു പേടിയായി മാറരുത്. അത് സന്തോഷകരമായ ഒരനുഭവമായിരിക്കണം. കുട്ടികളിലെ ഭക്ഷണ വൈകല്യങ്ങളെ നേരത്തെ തിരിച്ചറിഞ്ഞ് ചികിത്സ നൽകിയാൽ അവർക്ക് നല്ല ആരോഗ്യവും ഉന്മേഷവും തിരികെ നൽകാം. വീടിനുള്ളിൽ ശാന്തമായ അന്തരീക്ഷത്തിൽ ഭക്ഷണം കഴിക്കാൻ കുട്ടികളെ പ്രോത്സാഹിപ്പിക്കുന്നത് അവരുടെ വളർച്ചയ്ക്ക് ഏറെ സഹായിക്കും.

സയനോര ഗോപകുമാര്‍