പരീക്ഷാസമയത്ത് ആത്മവിശ്വാസം വളർത്താൻ ലളിതമായ അഞ്ചു വഴികൾ

​പരീക്ഷകൾ വെറുമൊരു കടമ്പകളല്ല. മറിച്ച് കുട്ടികളുടെ കഴിവും പുരോഗതിയും അളക്കാനുള്ള അവസരങ്ങളാണ്. ഇത് മനസ്സിലാക്കി കുട്ടികളെ തയ്യാറാക്കുന്നത് അവരിൽ വലിയ മാറ്റമുണ്ടാക്കും.

​1. പരീക്ഷയെ അടുത്തറിയുക

​പരീക്ഷകൾ എന്തിനുവേണ്ടിയാണെന്ന് കുട്ടികൾക്ക് കൃത്യമായ ധാരണ നൽകുക. ഭാഷാ പഠനത്തിൽ ഇമെയിൽ എഴുതുന്നതോ ചോദ്യങ്ങൾക്ക് മറുപടി നൽകുന്നതോ പോലുള്ള കാര്യങ്ങൾ നിത്യജീവിതത്തിലും ഉപകരിക്കുമെന്ന് അവരെ ബോധ്യപ്പെടുത്തുക. ഇത് പരീക്ഷയോടുള്ള ഭയം കുറയ്ക്കാൻ സഹായിക്കും.

​2. പരിശീലനം നൽകുക

​പരീക്ഷയുടെ രീതിയും സമയക്രമവും കുട്ടികൾക്ക് പരിചിതമായിരിക്കണം. മുൻവർഷങ്ങളിലെ ചോദ്യപേപ്പറുകൾ ഉപയോഗിച്ച് മോഡൽ ടെസ്റ്റുകൾ നടത്തുന്നത് പരീക്ഷാഹാളിലെ പരിഭ്രമം ഒഴിവാക്കാൻ സഹായിക്കും. ഉത്തരങ്ങൾ വിലയിരുത്തുന്ന രീതി കുട്ടികൾക്ക് ലളിതമായ ഭാഷയിൽ വിവരിച്ചു നൽകുക.

​3. സ്വയം പഠിക്കാൻ പ്രേരിപ്പിക്കുക

​ക്ലാസ് മുറിയിലെ പഠനത്തിന് പുറമെ സ്വന്തമായി പഠിക്കാനുള്ള സാഹചര്യം ഒരുക്കുക. കുട്ടികൾക്ക് അനുയോജ്യമായ പഠനസമയം കണ്ടെത്താനും ഒരു സ്റ്റഡി ഷെഡ്യൂൾ തയ്യാറാക്കാനും അവരെ സഹായിക്കുക. കൂട്ടുകാർക്കൊപ്പം ചേർന്ന് ക്വിസ് മത്സരങ്ങൾ നടത്തുന്നത് പഠനം ആസ്വാദ്യകരമാക്കും.

​4. ശരിയായ മാനസികാവസ്ഥ

​’എനിക്ക് ഇതിന് സാധിക്കും’ എന്ന വിശ്വാസം കുട്ടികളിൽ വളർത്തുക. തെറ്റുകളെ പരാജയമായല്ല മറിച്ച് പഠിക്കാനുള്ള അവസരമായാണ് കാണേണ്ടതെന്ന് അവരെ പഠിപ്പിക്കുക. പരീക്ഷാദിവസം ആത്മവിശ്വാസത്തോടെ ഇരിക്കുന്നത് സങ്കൽപ്പിച്ചു നോക്കാൻ അവരെ പ്രേരിപ്പിക്കുക.

​5. മനസ്സിനെ ശാന്തമാക്കുക

​അമിതമായ ഉത്കണ്ഠ പഠനത്തെ ബാധിക്കും. ശ്വസന വ്യായാമങ്ങൾ മനസ്സിനെ ശാന്തമാക്കാൻ സഹായിക്കും. ‘ ഞാൻ കഠിനാധ്വാനം ചെയ്തിട്ടുണ്ട് എനിക്ക് നന്നായി എഴുതാൻ കഴിയും ‘ തുടങ്ങിയ നല്ല ചിന്തകൾ അവരിൽ വളർത്തുക.

സീനിയ എൽസ ഇഗ്‌നേഷ്യസ്

കടപ്പാട്- ലൈഫ് ഡേ